Xhamia e Klleznës Uebfaqja zyrtare
Vëllezër dhe motra në Islam!
Tema e predikimit të sotëm është:
Haram janë bixhozi, basti dhe lojërat e fatit
Tema e lartpërmendur e trajton një problem të madh social, i cili si një epidemi e ka kapluar shoqërinë tonë.
Allahu i Plotfuqishëm, bixhozin e ka ndaluar gradualisht dhe Ai e di më së miri, por dijetarët mendojnë, se arsyeja e kësaj është që njerëzit e xhahilijetit (periudha para Islamit) ishin të përfshirë në këtë haram dhe vështirë se do ta lënin atë nëse ndalimi do të vinte përnjëherësh.
Në ajetin 219 të sures el-Bekare, Allahu i Plotfuqishëm, tregon për efektet e dëmshme të alkoolit dhe bixhozit:
“Të pyesin ty për verën dhe bixhozin. Thuaju: “Ato u sjellin dëme të mëdha (mëkate), por edhe dobi për njerëzit, mirëpo, dëmi është më i madh se dobia.” Dhe të pyesin ty sa duhet dhënë lëmoshë. Thuaju: “Tepricën!” Qe, kështu ua shpjegon Allahu argumentet e Tija, që të mendoni.”
Pastaj janë shpallur ajetet 90 dhe 91 të sures el-Maide, në të cilët vjen ndalimi i qartë e alkoolit, bixhozit, statujave dhe shigjetave:
“O besimtarë! Me të vërtetë, vera (pijet alkoolike), bixhozi, statujat dhe shigjetat e fallit janë vepra të ndyta nga punët e djallit. Pra, për të shpëtuar, largohuni nga këto!
Me të vërtetë, djalli me pije alkoolike dhe me bixhoz dëshiron që të fusë në mes jush armiqësi dhe urrejtje dhe t’ju shmangë juve nga të kujtuarit e Allahut dhe kryerjen e namazit. Prandaj, a doni të shmangeni? (Shmanguni ju nga këto vepra të këqija)!”
Allahu i Plotfuqishëm, nga urtësia e Tij universale, e ka ndaluar bixhozin, sepse bixhozi është vepër e shejtanit dhe një e keqe, e cila shkakton shumë pasoja negative, ndër të cilat – siç thotë Kurani – armiqësi dhe urrejtje në mes të njerëzve dhe largim nga përmendja e Allahut të Plotfuqishëm dhe nga namazi. Bixhozxhinjtë e përvetësojnë pasurinë e njerëzve të tjerë dhe jetojnë në iluzionin, se me lehtësi dhe pa mundim mund të arrijnë deri te pasuria.
Pejgamberi (savs), e ka dënuar vetëm të menduarit për bixhoz, kështu në një hadith të transmetuar nga Ebu Hurejre (r.a.) thotë:
“Dhe kush i thotë shokut të tij: ‘Eja të luajmë bixhoz!’ le të ndajë sadakë!” (Muslimi)
Disa dijetarë konsiderojnë se ai që e thërret personin tjetër për bixhoz, është i detyruar të ndajë sadakë në vlerë të asaj shume që ka planifikuar të investojë në bixhoz, në mënyrë që të pastrohet nga ai mëkat. Atëherë, mund të imagjinojmë se sa është mëkati për vetë bixhozin?!
Në bixhoz numërohet çdo lojë, e cila luhet me para, me bast, ose me ndonjë vlerë tjetër ku vetëm një pjesëmarrës fiton, kurse të gjithë të tjerët humbin. Pastaj, aty numërohen lojërat e fatit, siç janë: lotaria, bingo, bileta të ndryshme fati dhe bastet. Këtu përfshihen edhe lojërat: si shahu, tavlla, letrat e të ngjashme, nëse luhen me para dhe shkaktojnë sharje dhe fjalë banale dhe nëse për shkak të tyre njerëzit e lënë pas dore namazin dhe obligimet tjera.
Në bixhoz nuk përfshihen kuizet, sepse ato bazohen në dituri dhe jo në fat, si dhe lojërat shpërblyese në dyqane, në të cilat faturës së blerjes i bashkëngjitet kuponi shpërblyes, për mallrat që klienti i blen për nevojat e tij të rregullta, dhe jo për shpërblim.
Psikologët kanë konstatuar se bixhozi tek njerëzit shkakton emocion, pastaj zhgënjim, dhe në fund urrejtje dhe armiqësi. Bixhozi, lojtarit që luan, i bëhet kuptim i jetës dhe si një lloj i lëndëve narkotike, me të cilën ai, si një frikacak i vërtetë përpiqet të shpëtojë nga realiteti dhe problemet.
Është e trishtueshme të shikohet sesi fëmijët, rinia, e për fat të keq edhe më të vjetrit gjithnjë e më shumë shpenzojnë kohë në kazino ose më mirë të themi në “thertore”, sepse ato ju sjellin fatkeqësi atyre dhe familjeve të tyre.
Është e trishtueshme të shikohet sesi njerëzit me dëshirë të madhe e presin bingon para ekranit të televizorit, dhe është e trishtueshme të shikohet sesi disa njerëz sa pak punojnë, kurse nga lojërat e fatit presin shumë, duke harruar proverbin: “Budallai mbështetet në lojëra të fatit, ndërsa i mençuri në mundin e vet dhe në ndihmën e Allahut!”
Pasioni për lojërat e fatit e shkatërron jetën e njeriut dhe martesën, ia shkatërron njeriut të gjitha virtytet dhe vlerat njerëzore, ia shkatërron mendjen, krenarinë dhe dinjitetin, ashtu që një lojtar i bixhozit është i gatshëm të mashtrojë, të gënjejë, të vjedhë, edhe të kryejë vrasje, vetëm për të ardhur deri te mjetet për bixhoz.
Bixhozxhiu e shkatërron pasurinë e tij, e privon nga e drejta familjen e tij, të cilën është i obliguar për ta mbajtur, preokupohet psikologjikisht, dalldiset dhe dehet, si dhe kot e harxhon kohën e tij, të cilën gjë Islami shprehimisht e ndalon.
Islami ndalon çdo lloj të ndihmës dhe bashkëpunimit me kazinotë. Kompanive dhe individëve nuk ju lejohet të marrin me qira lokale për të hapur kazino. Gjithashtu nuk lejohet të punohet në kazino, as në sigurimin e as në pastrimin e saj. Nëse një shoqëri e bojkoton çdo lloj bashkëpunimi me ta, kazinotë shumë shpejt do të zhdukeshin nga ajo shoqëri.
Statistikat tregojnë se bixhozi dhe kazinotë shkaktojnë më shumë se 30% të veprimeve kriminale në shoqëri.
Nga ana tjetër, sa shumë miliona merren në mënyrë të paligjshme nga ana e investitorëve në bixhoz dhe kazino, pa përfituar asgjë, me çka dobësohet ekonomia e popullit dhe shoqërisë, ndërsa forcohen pronarët e kazinove.
Kazinotë dhe bixhozi njerëzve ua vrasin frymën e garimit dhe investimit dhe i edukojnë ata në një botë të ëndrrave dhe imagjinatës, duke shpresuar se edhe ata një ditë, në mënyrë të lehtë dhe përnjëherë do të bëhen të pasur. (…)
Muslimanët besojnë se nafaka e çdo njeriu është e caktuar qysh nga çasti kur i jepet shpirti në mitrën e nënës së tij, dhe ai është i obliguar të përpiqet ta arrijë fitimin hallall për ushqimin e vetvetes dhe të familjes së tij, madje edhe t’i ndihmojë të tjerët. Prandaj, shkuarja në kazino dhe përpjekja që në mënyrë haram njeriu ta ‘shtojë’ nafakën e tij, është krejtësisht e gabuar.
Vëllezër të dashur!
Le ta ruajmë vetveten dhe familjen nga bixhozi dhe lojërat e fatit, sepse ato janë një e keqe e madhe për individin dhe shoqërinë!
Le të ruhemi nga harami dhe mekruhi dhe të ruhemi nga shoqëria e keqe!
Le të garojmë në vepra të mira, le të jemi të dëgjueshëm ndaj prindërve tanë, le t’i edukojmë fëmijët tanë në Islam, le t’i kryejmë rregullisht namazet e përcaktuara dhe le të përgatitemi për vdekjen dhe për Ditën e llogaridhënies!
O Allah, na forco në rrugën e Islamit, na bëj neve prej atyre me të cilët Ti je i kënaqur dhe mos na sprovo me atë që nuk mund ta përballojmë!
Ndihmoji vëllezërit dhe motrat tona në nevojë kudo që janë!
Na ruaj nga e keqja e armiqve të umetit dhe të atdheut, kurse intrigat e tyre ktheji mbi kokat e tyre!
Na i mëshiro prindërit dhe paraardhësit tanë të vdekur, të cilët na e sollën dritën e fesë sonë!
Na i udhëzo fëmijët dhe pasardhësit tanë, dhe bëji udhëheqës të umetit dhe mbrojtës më të mirë se ne të fesë dhe atdheut, dhe gëzim të syve dhe zemrave tona në këtë botë dhe në botën tjetër!
Na mëshiro neve në Ditën e Gjykimit dhe na ndero në xhenet me shoqëri të pejgamberëve të sinqertëve, të shehidëve dhe të njerëzve të mirë!
Hatib Nezim Halilovic Muderis
Perktheu: Miftar Ajdini
